Një grup i senatorëve republikanë dhe demokratë në Shtetet e Bashkuara hartoi një rezolutë që thotë se princi i kurorës i Arabisë Saudite, Mohammed Bin Salman, është "bashkëfajtor" në vrasjen e gazetarit saudit, Jamal Khashoggi.
Rezoluta, kryesisht simbolike, vjen pas pakënaqësisë midis ligjvënësve amerikanë për mënyrën se si administrata e presidentit Donald Trump i është përgjigjur vrasjes së Khashoggit.
Khashoggi, banor i SHBA-së dhe kontribues në gazetën Washington Post, është vrarë në konsullatën saudite në Stamboll, në muajin tetor.
Ai ka qenë kritik i zëshëm i regjimit saudit.
Rezoluta në SHBA u mbështet nga senatori republikan, Lindsey Graham, dhe senatorja demokrate, Dianne Feinstein.
Ajo thotë se Senati "ka një nivel të lartë besimi" se princi i kurorës "është bashkëfajtor në vrasjen".
Trump, administrata e të cilit ka kultivuar lidhje të ngushta me Riadin, ka bërë përpjekje të minimizojë përfshirjen e princit të kurorës në vrasje.
Presidenti vazhdimisht e ka theksuar rëndësinë e Arabisë Saudite për SHBA-në, duke e quajtur atë “partner të palëkundur”.
