Me kërkesë të opozitës, Kuvendi i Kosovës po zhvillon një debat në një seancë të jashtëzakonshme për çështjen e liberalizimit të vizave. Ky vendim u mor pas dështimit të seancës paraprake, të thirrur po nga opozita lidhur me mospërfshirjen e vendit në agjendën e takimit të Këshillit të Ministrave të Bashkimit Evropian, për liberalizimin e vizave.
Fillimisht, Kryesia e Kuvendit vendosi që seanca e thirrur për orën 16:00 të mos mbahej, për shkak të dyshimeve se janë manipuluar nënshkrimet e dy deputetëve, për të thirrur këtë seancë.
Seancë është thirrur nga dy partitë më të mëdha opozitare në Kosovë, Lidhja Demokratike e Kosovës dhe Lëvizja Vetëvendosje, të cilat kanë vlerësuar se “dështimet e koalicionit qeverisës, kulmuan me mosliberalizim të vizave”.
Kryetari i Kuvendit, Kadri Veseli tha se iniciuesit e kësaj seance të jashtëzakonshme kanë paraqitur nënshkrimet e nevojshme për mbajtjen e saj.
