Shoqata e Prokurorëve të Kosovës ka bërë të ditur se ish-prokurori Elez Blakaj, nuk ka shprehur asnjë shqetësim apo kërcënim që ka të bëjë me punën e tij.
Sipas kësaj shoqate, deklarimet publike të prokurorit të dorëhequr, janë për t’i mbuluar interesat e tij personale.
“Deri më tani, asnjë prokuror i sistemit prokurorial të Kosovës, duke përfshirë dhe ish-prokurorin Blakaj, nuk ka shprehur asnjë shqetësim, qoftë si kërcënim apo si ndikim në punën e tij të pavarur dhe të paanshme nga kushdo qoftë. Andaj, deklarimet publike për kinse kërcënimet dhe ndikimet brenda sistemit prokurorial, janë për të mbuluar interesat e tij personale apo të kujtdo tjetër”, thuhet në këtë reagim.
Po ashtu, Shoqata e Prokurorëve të Kosovës “zotohet se do të reagojë më fuqishëm, duke kërkuar përgjegjësi nga prokurorët që me veprimet e tyre dëmtojnë imazhin e sistemit prokurorial, interesat e qytetarëve dhe institucioneve shtetërore të Republikës së Kosovës”.
Në këtë reagim, kjo shoqatë shpreh shqetësim të madh për situatën e krijuar në sistemin prokurorial pas dorëheqjes së prokurorit special, Elez Blakaj, i cili po merrej me rastin e veteranëve.
“Menaxhmenti i sistemit prokurorial nuk mund të degradohet nga qarqet e caktuara politike, apo individë të caktuar nga shoqëria civile, sepse kjo konsiderohet ndërhyrje e drejtpërdrejtë në punën e pavarur të sistemit prokurorial dhe tendencë për t’i dëmtuar hetimet në rastet e caktuara penale”, thuhet në reagimin e shoqatës.
Reagimi i nënshkruar nga kryetari i kësaj shoqate, Haxhi Dërguti, bën të qartë se “Shoqata e Prokurorëve të Kosovës mbështet fuqishëm punën e çdo prokurori individualisht dhe organeve menaxhuese të sistemit prokurorial, si dhe dënon çdo tendencë për të denigruar përkushtimin e secilit prokuror në mënyrë individuale dhe kolektive, gjë që është plotësisht e papranueshme dhe nuk i ndihmon zbatimit të Ligjit në Republikës e Kosovës”.
Qytetarë dhe shoqëria civile në Kosovë, ditën e mërkurë kanë mbajtur një protestë duke kërkuar dorëheqjen e kryeprokurorit Aleksandër Lumezi, por i njëjti ka thënë se nuk do të dorëhiqet pavarësisht presionit publik.
