Një 14-vjeçar nga Kamenica ka vdekur si pasojë e dhunës së ushtruar nga babai i tij, ka konfirmuar Policia e Kosovës.
Sipas njoftimit të Policisë, në Qendrën e Mjekësisë Familjare në Kamenicë, pas mesnatës, fëmija është sjellë pa shenja jete.
“Pas hetimeve te para në vendin e ngjarjes nga njësitet e hetimeve rajonale të Policisë së Kosovës dhe Prokurori i shtetit, dyshohet se si pasojë e dhunës fizike – rrahjes së ushtruar nga i dyshuari, prindi i viktimës G. B., shqiptar shtetas i Kosovës, i lindur më 1958, si pasojë e goditjeve me mjete të forta - besohet shkop druri - fëmija ka ndërruar jetë”, thuhet në njoftimin e Policisë.
G.B e kishte rrahur djalin e tij gjashtë orë para se ta dërgonte në Qendrën e Mjekësisë Familjare.
Motivet e kësaj ngjarjeje besohet se lidhen me faktin se fëmija ka shpenzuar disa para të prindit pa dijeninë e tij.
