Republika e Madagaskarit e ka njohur pavarësinë e Kosovës, ka njoftuar mbrëmë zëvendëskryeministri i Kosovës, Behgjet Pacolli.
Ai tha mbrëmë se e ka pranuar zyrtarisht “notën verbale” të njohjes nga Madagaskari, pas një takimi që ka zhvilluar me kolegun e tij nga ky vend, Rabary Njaka, në margjina të takimit të vendeve të Frankofonisë, në Paris.
“Jam i lumtur të shpalli se Madagaskari e ka njohur Kosovën si shtet të pavarur dhe sovran”, ka shkruar mbrëmë në rrjetin Twitter, Behgjet Pacolli, i cili është edhe ministër i jashtëm i Kosovës.
Aktualisht, Kosova është e njohur nga 115 vende anëtare të Kombeve të Bashkuara.
