Shoqatat e gazetarëve thonë se akuzat e pushtetit se gjoja mediat po punojnë për thellimin krizës, nuk mbajnë. Ato thonë se është pikërisht pushteti ai që përmes presioneve po tenton të shpërqendroj vëmendjen nga problemet reale.
Asociacionet e gazetarëve kërkojnë ndërprerjen e presioneve të pushtetit mbi punën e gazetarëve,mediave ndërsa hedhin poshtë pretendimet e zyrtarëve se puna e tyre, por edhe e organizatave të ndryshme joqeveritare, që financohen nga Fondacioni për Shoqëri të Hapur, ka për qëllim thellimin e krizës politike apo edhe ndërrimin e pushtetit në vend.
Presionet e zyrtarëve ndaj mediave që kritikojnë punën e tyre kanë vazhduar me themelimin edhe të një organizate “Stop Operacionit Soros”, që sipas saj, “ka për qëllim informimin e qytetarëve për aktivitetet e dëmshme të organizatave joqeveritare të financuara nga shoqata të jashtme”.
Biljana Petkovska, nga Instituti Maqedonas i Mediave, thotë se pretendimet e tilla nuk qëndrojnë ndërsa beson se presionet ndaj mediave më tepër kanë të bëjnë me shpërqendrimin e vëmendjes nga problemet aktuale dhe kriza politike.
“Mendoj se Maqedonia ka nevojë për një proces të domosdoshëm të depolitizimit të mediave si dhe për freskimin e kësaj hapësire nga individë të caktuar që paraqiten si gazetarë, ndërsa nga ana tjetër janë në shërbim të partive të caktuara politike”.
“Maqedonia në raportet e të gjithë institucioneve relevante ndërkombëtare paraqitet e fundit sa i përket lirisë së mediave dhe në këtë kuadër shtrohet pyetja se cili është roli i institucioneve shtetërore, apo nëse vallë mediat e kanë sjellë këtë gjendje apo format e presionit mbi punën e tyre”, thotë Petkovska.
Shoqata e Gazetarëve të Maqedonisë vlerëson se sulmet e tilla kanë për qëllim forcimin e siç thuhet, njëmendësisë në vend.
“Gruevski dëshiron ta zyrtarizoj pushtetin e tij diktatorial. Ai po lufton vlerat elementare të një demokracie liberale. Ai nuk toleron kritika ndaj pushtetit. Ai e lufton Sorosin, sepse është i vetëdijshëm se nuk mund ta kontrolloj dhe nuk mund ta korruptoj, dhe për sistemet totalitare çdo gjë që nuk mund të kontrollohet paraqet rrezik”, tha Naser Selmani, kryetar i Shoqatës së Gazetarëve të Maqedonisë.
Ndërkohë, nga qendra maqedonase për verifikimin e fakteve në media sulmet ndaj sektorit civil i ndërlidhin me rezultatin e dobët të VMRO-së në zgjedhjet e fundit.
“Çështja e “desorosoizimit” (anti-Soros) nuk ka sqarim tjetër përveçse përpjekjes së kryesisë së VMRO DPMNE-së dhe të vet Nikolla Gruevskit për të arsyetuar para anëtarësisë rezultatin e dobët zgjedhor.
Këto media dhe organizata joqeveritare kanë ekzistuar edhe para zgjedhjeve, edhe në vitin 2014 kur VMRO-ja kishte rezultat shumë të mirë zgjedhor, por asnjëherë nuk është ngritur çështja e veprimtarisë së tyre sikur tani”.
“Qëllimi kryesor është dobësimi apo edhe mbyllja e tyre, që do të dëmtonte si asnjëherë më parë demokracinë edhe ashtu të dobët në vend”, thotë Vlladimir Petrevski, drejtues i qendrës maqedonase për verifikimin e fakteve në media.
Sulmet ndaj mediave nisën nga ana e VMRO-së menjëherë pas zgjedhjeve të 11 dhjetorit ndërsa u intensifikuan në protestat para KSHZ-së lidhur me kontestimin e rezultatit që mund të ndryshonte fitoren e saj.
Për dallim nga VMRO-ja, partneri i saj i deritanishëm në qeveri, BDI-ja ka dalë kundër presioneve ndaj mediave duke theksuar nevojën për raportimin e tyre pa presione.
