Kancelarja gjermane, Angela Merkel, ka fajësuar vendet evropiane për mbylljen “e njëanshme” të rrugës së Ballkanit për migrantët.
Ajo ka thënë se Greqia është në një “situatë shumë të vështirë” dhe se vendimet e tilla duhet të merren nga Bashkimi Evropian si i tërë.
Austria, Sllovenia, Kroacia, ashtu si edhe Serbia dhe Maqedonia, kanë mbyllur njëanshëm kufijtë për të penguar rrjedhën e migrantëve.
Ministrja e Brendshme e Austrisë, Johanna Mikl-Leitner, e cila ka nisur e para kufizimet kufitare në rajon, ka thënë sot se mbylljet e kufijve janë të përhershme.
BE-ja dhe Turqia, vendi prej ku migrantët arrijnë në Greqi, kanë hartuar një plan për lehtësimin e krizës.
Sipas planit, që duhet të finalizohet ende, të gjithë migrantët që arrijnë në Greqi nga Turqia, do të kthehen prapa. Për çdo sirian të kthyer, një sirian nga Turqia do të vendoset në Evropë.
Evropa po përballet me krizën më të rëndë me migrantë qysh nga Lufta e Dytë Botërore.
