Agjencia për Refugjatë e Kombeve të Bashkuara (UNHCR), njofton për afro 30 mijë refugjatë që presin në anën greke për të hyrë në Maqedoni. Përfaqësuesja e UNHCR-së në kampin e refugjatëve në Gjevgjeli, Aleksandra Kraus për Radion Evropa e Lirë ka bërë të ditur se gjatë 24 orëve të fundit në territorin e Maqedonisë nga Greqia kanë hyrë mbi 7 mijë refugjatë, të cilët pas pajisjes me dokumentacionin e nevojshëm, në formë të organizuar me tren ose autobusë nisen në kufirin me Serbinë . Ndërsa fluksi i emigrantëve rritet, zyra e Komisionerit të Lartë për Refugjatët në Kombet e Bashkuara, bën apel edhe për zgjidhje të sigurt akomodimi nga shtetet anëtare të Bashkimit Evropian.
