Bashkimi Evropian formalisht i ka ofruar Serbisë statusin e kandidatit për pranim në bllokun prej 27 shteteve evropiane.<br />
<br />
Mbrëmë vonë, në samitin e shefave të shteteve dhe qeverive të vendeve anëtare të Bashkimit Evropian në Bruksel, është arritur pajtueshmëria që Serbisë t’i jepet statusi i vendit kandidat.<br />
<br />
Megjithatë, anëtarësimi mund të zgjasë vite të tëra.<br />
<br />
Vendimin e shpalli presidenti i BE-së, Herman Van Rompoj, i cili theksoi se ky është edhe rezultat i dialogut Beograd – Prishtinë.<br />
<br />
<em>“Ne sonte u pajtuam për t’i dhënë Serbisë statusin e vendit kandidat për BE. Kjo është një e arritur e mrekullueshme dhe është rezultat i përpjekjeve të demonstruara nga të dy palët në dialogun ndërmjet Beogradit dhe Prishtinës".<br />
<br />
"Shpresoj se kjo do ta inkurajoj Serbinë për ndërmarrjen e përpjekjeve të mëtejshme me synim që t’i plotësoj kriteret politike dhe ekonomike për anëtarësim në BE. Poashtu, shpresoj se Beogradi do të vazhdoj ta mbështesë bashkëpunimin rajonal dhe marrëdhëniet e mira fqinjësore në Ballkanin Perëndimor”,</em> tha Van Rompoj.<br />
<br />
Të enjten, në Bruksel, shefja për politikë të jashtme e Bashkimit Evropian, Kethrin Eshton, ka shprehur mirënjohje ndaj kryeministrit të Kosovës, Hashim Thaçi, i cili po qëndron për vizitë zyrtare në Bruksel.<br />
<br />
Duke kujtuar atë që e ka cilësuar marrëveshje historike ndërmjet Prishtinës dhe Beogradit, sa i përket bashkëpunimit rajonal të të dyja palëve, Eshton ka vlerësuar kontributin e kryeministrit kosovar, për, siç ka thënë, vizionin dhe lidershipin e tij.<br />
<br />
<em>“Kjo marrëveshje do të thotë se Kosova do të marrë pjesë dhe do të flasë vetë për veten e saj në më shumë se 35 forume të ndryshme rajonale. Kosova po ashtu do të jetë në gjendje të nënshkruajë vetë marrëveshje. UNMIK-u tashmë ka deklaruar se do t’i lërë këto të drejta për Kosovën”,</em> ka thënë Eshton para gazetarëve në Bruksel. <strong>(f.b.)</strong>
Përdorimi i përmbajtjes sonë
⚠️ Përmbajtja e ueb-faqes dhe/apo platformave të tjera digjitale të Radios Evropa e Lirë mbrohet nga ligjet amerikane dhe ndërkombëtare për të drejtën e autorit.
Mirëpresim ripërdorimin, ripublikimin dhe rishpërndarjen e përmbajtjes sonë, të publikuar në platformat tona digjitale, me kusht që të na citoni drejt si "Radio Evropa e Lirë", bashkë me linkun që çon te përmbajtja jonë origjinale.
