Maqedoni: Anashkalohet historia shqiptare në shkolla

Kryetari i Shoqatës së Historianëve Shqiptarë në Maqedoni, Skender Asani, tha se tekstet e historisë në shumë raste nuk pasqyrojnë realitetin historik, ndërkohë që gjeneratat e reja mësojnë të pavërteta të shumta për të kaluarën e popullit të tyre, por gjithsesi edhe për të kaluarën e etnitetit tjetër të shtetit të përbashkët të shqiptarëve dhe maqedonasve.

Asani tha se për këtë duhet të mbajnë përgjegjësi autoritetet shtetërore, veçanërisht ata që përfaqësojnë shqiptarët në qeveri.

“I bëjmë apel partisë shqiptare në qeveri, që përfundimisht t’ia shtrojë dy kërkesa koalicionit qeveritar. Një është që të hartohen programe mësimore dhe në bazë të atyre programeve mësimore të shpallet konkursi dhe të botohen libra të reja. Kërkesa e dytë, nëse nuk pranohet e para, është të shkohet në libra paralelë, të cilët do të jenë vetëm për nxënësit shqiptarë dhe nuk do të kenë asnjë fyerje dhe asnjë shtrembërim të historisë së këtyre trevave”, u shpreh ai.

Ndërkaq, zëvendësministri i arsimit, Safet Neziri, tha se të gjitha defektet në tekstet shkollore nuk mund të shmangen me një të prekur të butonit.

Ai u shpreh se revidimi i teksteve shkollore është proces i ndërlikuar dhe njëherazi kërkon kohë dhe angazhim profesional të të gjithë të kyçurve në procesin e arsimit.

“Unë do të obligohem që në bashkëpunim me Lidhjen e Arsimtarëve dhe Historianëve Shqiptarë të Maqedonisë, si dhe të gjithë faktorët tjerë relevantë, të cilët kontribuojnë në procesin arsimor në Maqedoni, të formojmë një komision punues i cili do t’i shqyrtojë bashkë me Ministrinë e Arsimit të gjitha, librat faqe për faqe, dhe të shohim se ku realisht janë problemet, si dhe ku saktësisht duhet intervenuar që vitin e ardhshëm mos na paraqiten më probleme të kësaj natyre”, deklaroi Neziri.

Nga ana tjetër, kryetari i Lidhjes së Arsimtarëve Shqiptarë, Nuhi Dardhishta, theksoi se brendinë e teksteve të shkencave ekzakte, jo vetëm se përmendet fyerja ndaj shqiptarëve.

Po ashtu ai tha se në këto tekste ka të pavërteta të shumta për të kaluarën e popullit shqiptarë, dhe shtoi se dikasteri i arsimit jo rrallëherë angazhon përkthyes joprofesional të cilët edhe më shumë i komplikojnë njësitë mësimore për nxënësit shqiptarë.

“Gjithmonë shkohet nga ajo që të gjinden përkthyes më të lirë, joprofesionalë dhe bëhen gabime të shumta, ngase nuk mundet një përkthyes ta përkthejë tekstin e fizikës, pa marrë dhe konfirmimin nga profesori i fizikës, se gjithçka është në rregull, sepse bëhet fjalë për tekste profesionale, ku është në pyetje terminologjia e përdorur. Ne si LASH të Maqedonisë, vetëm i diktojmë problemet, por është dikasteri i arsimit ai që duhet t`i zgjidhë”, thotë Dardhishta.

Lidhja e Arsimtarëve Shqiptarë në Maqedoni si dhe shoqata e historianëve, theksuan se kompetentët, gjegjësisht Byroja për Zhvillimin e Arsimit dhe Ministria e Arsimit, duhet sa më parë t`i evitojnë të gjitha gabimet në tekstet shkollore, ngase manipulimi me arsimimin e një gjenerate të re paraqet lojën më të rrezikshme për ndërtimin e shtetit multietnik, siç është Maqedonia.