Gara për Tiranën po shndërrohet në një maratonë përballjesh gjyqësore.
Të mërkurën, Kolegji Zgjedhor do duhej të shqyrtonte ankimin e Partisë Socialiste për shpalljen e pavlefshmërisë së zgjedhjeve në 284 qendra votimi në Tiranë, nga 485 qendra gjithsej.
Por nga kjo kërkesë, Pardia Socialiste u tërhoq, duke kërkuar shqyrtimin prej kolegjit vetëm të një ankimi të ri, të bërë me datën 2 korrik.
Në ankimin e ri, socialistët i kërkojnë kolegjit, të urdhërojë Këshillin Qendror Zgjedhor që të marrë në shqyrtim kërkesën e depozituar nga selia rozë për pavlefshmëri të zgjedhjeve.
Pas vendimmarrjes së fundit, që shpallte fitues kandidatin Lulzim Basha, me 93 vota më shumë sesa kandidati i opozitës Edi Rama, KQZ nuk pranoi të marrë në shqyrtim ankesën e PS-së, për pavlefshmëri të zgjedhjeve, duke theksuar se janë tejkaluar afatet ligjore për një ankesë të kësaj natyre.
Pra, në thelb, të dyja ankesat e partisë socialiste në kolegj, kërkojnë të njëjtën gjë, e cila është pavlefshmëria e zgjedhjeve.
Por, tërheqja prej ankimit të parë, synon të rikthejë edhe një herë gjykimin në KQZ, e më pas në Kolegjin Zgjedhor.
Përfaqësuesit ligjor të Partisë Demokratike, kërkuan nga kolegji shqyrtimin e të dyja ankesave, në të njëjtën ditë.
Pra sot, ata akuzuan PS-në për zvarritje me qëllim të rezultatit për Tiranën.
Socialistet, megjithatë, zgjodhën të tërheqin ankesën drejtuar kolegjit, për pavlefshmëri të zgjedhjeve, gjë që u pranua prej tij.
Kolegji vendosi që ankesën e dytë të PS-së, që synon të zhbëjë procedurën me të cilën KQZ-ja trajtoi kërkesën e PS-së për pavlefshmëri, ta shqyrtojë të enjten në datën 7 korrik.
