Aleanca e Atlantikut të veriut do t'i përgjysmojë trupat e saj në Kosovë nga afro 10.000 në 5.000 brenda disa muajve, tha sekretari i përgjithshëm i NATO-s, Anders Fogh Rasmusen.
"Sot NATO ka vendosur ta përshtatë praninë e KFOR-it në Kosovë", thuhet në deklaratën e lëshuar në Bruksel, në të cilën përmendet progresi i arritur në Kosovë.
"Gjatë disa muajve të ardhshëm, KFOR-i do t'a reduktojë praninë e vet në mënyrë progresive në gjithsejt 5.000 trupa, duke shënuar një hap më tepër në përshtatjen e KFOR-it si forcë zbrapsëse", thuhet në komunikatë.
"Kushtet e sigurisë në Kosovë kanë vazhduar të përmirësohen, gjë që është shenjë pozitive jo vetëm për Kosovën, por për tërë rajonin", thuhet në njoftim.
"Institucionet lokale janë gjithnjë e më të afta për t'i marrë përgjegjësitë për detyrat e sigurisë", ka thënë Rasmusen.
"KFOR-i do të mbetet në gjendje t'i stacionojë forcat shpejt dhe me efektivitet kurdoherë dhe sa herë që të jetë e nevojshme, përfshirë trupat rezervë. Misioni i KFOR-it për të garantuar mjedis të sigurtë në Kosovë mbetet i pandryshuar", ka thënë Rasmusen.
Në fillim të vitit 2010, KFOR-i i reduktoi trupat nga 15.000 në 10.000 ushtarë.
