Lidhja Socialdemokrate e opozitës vlerëson se pas protestave të organizatës së quajtur “Viktimat e tranzicionit”, qëndron partia në pushtet VMRO-DPMNE, por nga partia qeveritare mohojnë çfarëdo lidhshmërie me protestat anti-opozitare.
Sekretari i përgjithshëm i Lidhjes Socialdemokrate, Andrej Petrov, thotë se në asnjë vend tjetër pushteti nuk organizon protesta kundër opozitës.
“Me siguri se përvojën e kanë marrë nga Sllobodan Millosheviqi, ose nga disa zhvillime që ndodhin në disa sisteme jodemokratike ose totalitare, në të cilat pakënaqësia e plotë që ekziston nga pushteti, barazohet me gjoja pakënaqësinë nga opozita”, thotë Petrov.
Por, VMRO-DPMNE-ja, përmes një prononcimi për opinionin, shkurtimisht është përgjigjur se partia e tyre nuk ka lidhshmëri me “Viktimat e tranzicionit”.
Analisti politik, Xhelal Neziri, vlerëson se protestat kundër LSDM-së janë absurde, sepse për të gjitha zhvillimet aktuale politike dhe ekonomike, përgjegjëse është Qeveria.
“Nuk ka ndodhur në historinë e pluralizmit në Maqedoni që të ketë protesta para selisë së opozitës, pasi opozita nuk ka pushtet për të vendosur, për të përmirësuar, apo përkeqësuar, jetën e qytetarëve”.
“Këto protesta, më tepër janë në funksion të propagandës së organizuar nga makineria propaganduese e kryeministrit Nikolla Gruevski, sesa një shprehje e sinqertë e revoltës së një grupi të caktuar të qytetarëve që paraqiten si viktima të tranzicionit”, vlerëson Neziri.
Ndërsa, eksperti i çështjeve politike, Gjorgji Spasov, është decid se protestimi kundër opozitës është karakteristikë e shteteve jodemokratike.
”Kjo është një metodë e parë në shtetet jodemokratike, me anë të së cilës porositet opozita se i ka të bllokuara kanalet institucionale të ndikimit të opozitës, por edhe nëse tenton që ta shfrytëzojë rrugën për të protestuar, do të largohet nga rruga”, sqaron Spasov.
Pjesëmarrësit në protestat kundër opozitës kanë mohuar se janë të porositur nga pushteti për ta kundërshtuar LSDM-në e opozitës dhe liderin e saj, Branko Cërvenkovski.
