Qeveria e Gjermanisë e ka njohur sot Kosovën si shtet të pavarur. Pas këtij vendimi të Qeverisë gjermane, presidenti Horst Koehler do t'i dërgojë një notë diplomatike presidentit të Kosovës, Fatmir Sejdiu.
"Qeveria sot u pajtua për njohjen e Republikës së Kosovës sipas së drejtës ndërkombëtare dhe për fillimin e marrëdhënieve diplomatike", tha zëdhënësi i Qeverisë, Urlich Wilhelm.
Ministri i Jashtëm gjerman, Frank-Walter Steinmeier, të hënën, pati thënë se Gjermania do ta njihte Kosovën.
Edhe Qeveria e Austrisë sot e ka njohur pavarësinë e Kosovës.
"I rekomandova qeverisë që të ndërmarrë hapat e domosdoshëm për njohjen e Kosovës", tha ministrja e Jashtme, Ursula Plassnik, në një kumtesë.
"Sipas ligjit austriak, qeveria i propozon presidentit që Qeversië së Kosovës t'i dërgohet letra e njohjes", thuhet më tutje në njoftim.
Ministri i Jashtëm italian, Masimo D'Alema, tha se në mbledhjen e nesërme të qeverisë mund të miratohet vendimi për njohjen e Kosovës.
Gjatë një interviste për radion italiane, zoti D'Alema tha se pavarësia e Kosovës "ishte e e pashmangshme". Sipas tij, "Kosova nuk mund të jetë gjithmonë nën administratën ndërkombnëtare dhe shtoi se "kosovarët nuk dëshirojnë më të jenë nën dominimin serb".
Nga Osloja raportohet se njohjen e Kosovës e ka paralajmëruar edhe Norvegjia.
"Mund të shpall se Norvegjia do ta njohë pavarësinë e Kosovës si shtet të pavarur", thuhet në njoftimin e ministrit të Jashtëm, Jonas Gahr Stoere.
Kështu, Norvegjia, që nuk është anëtare e Bashkimit Evropian, iu bashkua fqinjëve të saj, Danimarkës, Finlandës dhe Suedisë, që tashmë kanë deklaruar se do ta njohin pavarësinë e Kosovës.
