Pakistani i ka akuzuar forcat e Indisë se kanë hapur zjarr kundër minibusit shkollor në rajonin e kontestuar të Kashmirit, duke e vrarë shoferin dhe plagosur së paku 8 fëmijë.
Incidenti ka ndodhur sot në një sektor të Kashmirit të administruar nga Pakistani, ndërsa zyrtarët pakistanezë thonë se sulmet me predha nga trupat e Indisë po vazhdojnë.
Shoferi i minibusit u vra në vendin e ngjarjes kur u sulmua makina, thanë zyrtarët. Në minibus ishin 20 fëmijë të një shkolle private.
Fëmijët e lënduar, të moshës 10 e deri në 15 vjeçare, janë dërguar në spital.
“Trupat e Pakistanit janë përgjigjur në mënyrë efektive dhe e kanë marrë në shënjestër një postbllok të Indisë, prej nga po vinte zjarri”, thanë shërbimet përkatëse pakistaneze.
Nga autoritetet e Indisë nuk ka pasur komente të menjëhershme.