Pesë raste të reja me koronavirus u konfirmuan të mërkurën në Kosovë.
Ato rezultuan pas testimit të 358 mostrave, bëri të ditur Ministria e Shëndetësisë, duke u thirrur në të dhënat e Institutit Kombëtar të Shëndetësisë Publike të Kosovës.
Tetë pacientë u shëruan nga koronavirusi në 24 orët e kaluara, ndërsa raste aktive mbeten 104, thuhet në njoftim.
Që nga fillimi i pandemisë, në mars të vitit të kaluar, Kosova ka regjistruar gjithsej 107,926 raste me koronavirus.
Prej tyre, 2,265 pacientë kanë vdekur dhe 105,557 janë shëruar.
Aktualisht në Kosovë është duke u zhvilluar vaksinimi masiv i qytetarëve, që do të thotë se të gjithë personat mbi 18 vjeç mund të regjistrohen për t’u imunizuar.
Deri të martën, në Kosovë janë dhënë mbi 324,000 vaksina.
Qeveria e Kosovës ka thënë se ka prioritet vaksinimin e 60 për qind të qytetarëve deri në fund të vitit.
Lexoni edhe këtë: Qeveria miraton masat e reja për luftim të pandemisë