Bullgaria ka dëbuar 10 diplomatë rusë, duke thënë se ata kanë kryer aktivitete që konsiderohen në mospërputhje me statusin e tyre diplomatik.
Ministria e Jashtme bullgare ka thënë përmes një deklarate më 18 mars se u ka dhënë 10 diplomatëve, 72 orë për t’u larguar nga shteti.
Në deklaratë nuk janë dhënë hollësi për arsyet e dëbimit, mirëpo prej kur Rusia ka nisur pushtimin e paprovokuar të Ukrainës, ambasadori rus në Sofje ka bërë vazhdimisht deklarata kontradiktore rreth pozicionit të Bullgarisë në konflikt.
Ministria nuk ka thënë po ashtu se kush është në listën e të dëbuarve.
Ambasada ruse në Sofje ka thënë të premten se vendimi i Bullgarisë për diplomatët rusë është “një tjetër hap agresiv”, për të cilin Moska do të përgjigjet.
Në një deklaratë të lëshuar në kanalin e saj në Telegram, ambasada ka thënë se i konsideron dëbimet si shenjë se Bullgaria synon të shkëpusë lidhjet Bullgari-Rusi në minimum.
“Ky demarsh armiqësor do të marrë një vlerësim dhe një reagim përkatës, adekuat për frymën e re të marrëdhënieve dypalëshe”, ka thënë ambasada.
Lexoni edhe këtë: Sllovakia dëbon tre anëtarë të Ambasadës ruseNdërkohë, Letonia dhe Estonia kanë thënë se do të dëbojnë nga tre diplomatë rusë, derisa Lituania u kanë thënë katër rusëve që të largohen nga shteti.
Ministri i Jashtëm i Letonisë, Edgars Rinkevics, ka thënë në Twitter se Riga është duke dëbuar tre punëtorë të Ambasadës ruse “në lidhje me aktivitete që janë në kundërshtim me statusin e tyre diplomatik, dhe duke marrë parasysh agresionin e vazhdueshëm rus në Ukrainë”.
“Ky vendim është koordinuar me Lituaninë dhe Estoninë”, ka thënë ai.
Estonia ka thënë se tre diplomatëve, që u ka kërkuar të largohen, “kanë qenë duke minuar sigurinë e Estonisë dhe duke përhapur propagandë për të arsyetuar veprimet ushtarake të Rusisë".
Presidenti rus, Vladimir Putin, ka urdhëruar pushtimin e Ukrainës më 24 shkurt.
Ai ka urdhëruar “operacion special” për të çmilitarizuar Ukrainën.
Veprimi i Kremlinit ka nxitur zemërim dhe është dënuar në shumë vende të botës.
Shtetet e Bashkuara dhe aleatët janë përgjigjur me sanksione të ashpra kundër Moskës.
- Për t’u informuar rreth zhvillimeve më të fundit lidhur me Ukrainën, ndiqeni blogun tonë.