KFOR-i do të qëndrojë në Kosovë për aq kohë sa do të jetë e nevojshme, ka deklaruar komandanti Suprem i Forcave Aleate për Evropë, gjenerali Philip Breedlove, i cili ka qëndruar të enjten në Kosovë.
Këtë deklaratë gjenerali Breedlove e ka bërë gjatë një konference për medie në Prishtinë, pas takimeve që ai ka pasur me drejtuesit e institucioneve të Kosovës.
Ai ka theksuar se me liderët kryesorë të Kosovës ka biseduar për punën e madhe që po bëjnë burrat e gratë në kuadër të KFOR-it në Kosovë, duke theksuar se është mjaft inkurajues roli kontribuues i KFOR-it në ruajtjen e paqes në Kosovë.
Gjenerali Breedlove ka thënë se KFOR-i vazhdon të mbajë një ambient të qetë dhe të sigurt në Kosovë, si dhe të sigurojë lirinë e lëvizjes për të gjithë. Sipas tij, është shënuar përparim i dukshëm, por ka ende mjaft punë për t’u bërë.
“Përderisa Kosova i bën hapat e vet përpara në ndërtimin e së ardhmes, NATO do të mbetet e përkushtuar të luajë rolin e vet për stabilitet këtu. Ne do të mbetemi fleksibil dhe të pranishëm, si dhe do të ndryshojmë (numrin e ushtarëve) vetëm atëherë kur kushtet e sigurisë e lejojnë atë. Ky është një proces i kushtëzuar dhe ne do të qëndrojmë këtu si një forcë domethënëse në Kosovë, për aq kohë sa do të jetë e nevojshme”, theksoi gjenerali Breedlove.
Ai gjithashtu ka folur edhe për mundësitë e transformimit të Forcës së Sigurisë së Kosovës në Forca të Armatosura të Kosovës.
“Mendoj se ajo që e kemi thënë vazhdimisht është se do ta vëzhgojmë se si po bëhet transformimi, dhe nëse Kosova do të punojë edhe me fqinjët e saj që të arrijë marrëveshjen; pra ky është pozicioni ynë."
“Lajmi i mirë është që Forca ka shumë mundësi që të ndërveprojë me KFOR-in për ta marrë përvojën më të mirë, në mënyrë që ta kryejë punën e saj sa më mirë që është e mundur. Natyrisht, ne sërish po presim që të shohim se a kanë marrëveshje me të gjithë fqinjët e tyre dhe ne do t’i mbështesim që ta shfrytëzojnë këtë kohë që të stërviten dhe të trajnohen me KFOR-in, ashtu edhe siç po bëjmë ”, tha gjenerali gjenerali Breedlove.
Në anën tjetër, komandanti i forcave shumëkombëshe të KFOR-it, gjenerali Guglielmo Luigi Miglietta, tha se duhet t’i kushtohet mjaft rëndësi fluksit të madh të migrantëve dhe numrit të luftëtarëve që kanë marrë pjesë në luftërat e huaja.
Gjithashtu, ai ka theksuar se KFOR-i është mjaft i kënaqur me angazhimin e plotë të institucioneve të Kosovës dhe se sipas tij, rezultatet e para janë të prekshme.
“Një shembull që mund të jap, lidhur me luftëtarët e huaj, është se Policia e Kosovës ka shënuar arritje brenda kornizës ligjore. Dëshiroj të nënvizoj se si Policia e Kosovës demonstroi efikasitetin e saj gjatë këtyre muajve të fundit me një profesionalizëm të lartë.”
“Dëshiroj të nënvizoj bashkëpunimin e ngushtë ndërmjet Policisë së Kosovës, EULEX-it dhe KFOR-it. Për ta përmbyllur; KFOR-i do të vazhdojë të mbajë një ambient të qetë dhe të sigurt për të gjithë banorët e Kosovës, dhe të garantojë kushte të sigurisë për hapat e ardhshëm drejt procesit të normalizimit”, ka komandanti i KFOR-it, gjeneral Miglietta.
Gjatë vizitës në Kosovë, komandanti Suprem i Forcave Aleate për Evropë, gjenerali Philip Breedlove, ka zhvilluar takime të ndara me presidenten e Kosovës, Atifete Jahjaga, dhe kryeministrin e Kosovës, Isa Mustafa.
Presidentja Jahjaga, përmes një komunikate për medie, ka theksuar se me gjeneralin Breedlove ka diskutuar për zhvillimet e fundit politike në vend, situatën dhe sfidat e sigurisë në Kosovë dhe rajon, transformimin e Forcës së Sigurisë së Kosovës dhe procesin e integrimit të vendit në NATO.
Në komunikatën për medie, gjithashtu thuhet se presidentja Jahjaga ka kërkuar “vendosjen e marrëdhënieve formale ndërmjet Republikës së Kosovës dhe NATO-s, si përmbushje e aspiratave të vendit për të realizuar integrimin euroatlantik dhe anëtarësimin eventual në NATO”.
Ndërkaq, kryeministri i Kosovës, Isa Mustafa, po ashtu përmes një komunikate për medie, ka theksuar se e ka njoftuar gjeneralin Breedlove për progresin që po arrihet në Kosovë në avancimin e gjendjes së sigurisë, për proceset integruese evropiane, zhvillimin ekonomik, forcimin e shtetit ligjor dhe reformat e tjera.
Mustafa gjithashtu ka theksuar përkushtimin dhe rezultatet konkrete të Kosovës në luftën kundër radikalizmit të dhunshëm dhe terrorizmit, si dhe hapat e mëtejmë në kuadër të luftës së përbashkët të koalicionit global kundër këtyre dukurive.
