Përfaqësues të qeverisë dhe ata të opozitës shprehin mendime krejtësisht kundërthënëse në lidhje me sukseset, ngecjet por edhe dështimet e diplomacisë dhe politikës së jashtme gjatë vitit 2011.
Në Ministrinë e Punëve të Jashtme thonë se krahasuar me fazën fillestare të diplomacisë, sivjet ata kanë arritur shumë rezultate, përderisa ish-ministri i Jashtëm Skender Hyseni, mendon se qeveria ka krijuar aq shumë dikastere në këtë fushë sa që e ka lënë Kosovën pa adresë të saktë në politikën e saj të jashtme.
Mirëpo, në anën tjetër, zëvendësministri i Jashtëm, Ibrahim Gashi thotë se sivjet Kosova ka shënuar në evalvim shumë pozitiv në politikën e saj të jashtme.
“Aktivitetet e Ministrisë së Jashtme do të mund të përmblidheshin në tri domene kryesore. Nën një: hartimi i dokumenteve për konsolidimin dhe avancimin e punës së MPJ-së dhe shërbimit diplomatik të Kosovës. Nën dy: implementimin me sukses të strategjisë për kompletimin e njohjeve të shtetit të Kosovës, dhe tre: prezantimin dhe afirmimin e profilit të Kosovës si shtet demokratik dhe funksional nëpërmes diplomacisë publike”, thotë Gashi.
Ndërkohë, ish-ministri i Jashtëm, Skender Hyseni tërheqë vërejtjen se Ministria e Jashtme nuk po e kryen punën e vet.
Ajo sipas tij, po i ngjan një organizate joqeveritare.
Skender Hyseni
“Fatkeqësisht po bëhet lojë në rrafshin diplomatik. Qeveria e Kosovës është skajshmërisht joserioze në fushën e marrëdhënieve ndërkombëtare. Ka ndërtuar aq shumë dikastere që merren me politikën e jashtme sa që nuk ka një adresë të saktë në Kosovë të politikës së jashtme. Është MPJ-ja ajo që do të duhej dhe koordinonte çdo aktivitet në fushën e marrëdhënieve ndërkombëtare, por fatkeqësisht ajo këtë nuk e bën”, vlerëson Hyseni.Një aspekt me prioritet në politikën e jashtme gjatë vitit 2011 ishte lobimi dhe shtimi i numrit të njohjeve.
Megjithatë, i tërë viti Kosovës i solli vetëm 13 njohje.
Ish-ministri Hyseni thotë se qeveria e ka shndërruar lobimin në tregti politike, çka sipas tij, është një veprim me rrezik për një vend që pret njohje të reja ndërkombëtare.
“Ju nuk guxoni të leni përshtypjen se njohja e Kosovës mund të materializohet në çfarëdo mënyre qoftë përpos asketit formalo - juridik në rrafshin ndërkombëtar sipas të Drejtës Ndërkombëtare. Kërkimi i njohjes duhet të jetë proces shumë i pastër dhe po ashtu vet procesi dhe akti i njohjes duhet të jetë një proces tej mase i pastër”, thekson Hyseni.
Kritikave të opozitës për numrin e madh të dikastereve dhe përzierjen e kompetencave në rrafshin diplomatik, qeveria u përgjigjet me vlerësimin se në mandatin e qeverisë së kaluar, Kosova vetëm po fillonte me ndërtimin e politikës së jashtme dhe diplomacisë, kurse sivjet dhe vitin e ardhshëm ajo po e konsolidon atë. Kështu të paktën mendon zëvendësministri Ibrahim Gashi.
Viti 2012 do të jetë vit i konsolidimit të MPJ-së...
Sidoqoftë, përplasjet në relacionet qeveri - opozitë në lidhje me politikën e jashtme janë të vazhdueshme.
Opozita mendon se caktimi i zëvendëskryeministrit të parë Behxhet Pacolli për çështje të lobimit, pastaj i emërimi i dy zëvendësministrave të jashtëm krahas ministrit Enver Hoxhaj, si dhe caktimi i një të dërguare të posaçme për bisedimet me Serbinë, paraqet një kaos përfaqësimin e Kosovës në politikën e saj të jashtme.
Ndërkaq qeveria vlerëson se Kosovës i nevojiten shumë adresa që ta përfaqësojnë vendin sa më mirë dhe në mënyrë gjithëpërfshirëse në këtë fushë.