Konsullata e Përgjithshme e Turqisë në Prizren është sulmuar sot në orët e mëngjesit me gurë dhe gaz molotovi.
Si pasojë e këtij sulmi, që besohet se është kryer me shishe molotovi dhe gurë, objekti ka pësuar dëme të vogla materiale.
Kryeprokurori i Prokurorisë Themelore të Prizrenit, Sylë Hoxha ka thënë për Radion Evropa e Lirë se ngjarja ka ndodhur në orët e hershme të mëngjesit.
“Rreth orës 04:00 të mëngjesit, me një gaz molotovi dhe gurë disa persona kanë gjuajtur ndërtesën. Menjëherë kemi dalë në vendin e ngjarjes dhe u kemi dhënë udhëzime edhe policisë si të veprojnë tutje”, ka thënë Hoxha.
Më pastaj, ka nënvizuar ai, janë ndaluar pesë të dyshuar të cilët e kanë pranuar kryerjen e kësaj vepre.
“Ata e kanë pranuar veprën në prani të avokatit, janë në ndalim dhe hetimet vazhdojnë”, ka thënë Sylë Hoxha.
Sipas tij, personat e arrestuar kanë deklaruar se ishin nën euforinë e Festës së Flamurit dhe pasi që kishin dëgjuar këngë folklorike shqiptare, kishin ndërmarrë një veprim të tillë.
